Jehová Diosca ñucanchicunata Ruraj Diosmi can. Paica ñucanchicuna ricui ushashcata, na ricui ushashca cosascunatapashmi rurarca. Ñucanchicuna ricui ushashca cosascunata nara rurashpallatami Jehová Diosca ashtaca angelcunata rurarca. Angelcuna ¿imashina cajta yachanguichu? Angelcunataca Jehová Diosmi paiman rijchajta rurarca. Ñucanchicunaca Jehová Diosta, angelcunatapash na ricuita ushanchichu. Jehová Dios rurashca punda angelca, Jehovataca tucuipimi ayudarca. Chaimandami estrellacunata, planetacunata, shuj cosascunatapash ruraita ayudarca. Ñucanchicunaca Jehová Dios rurashca juyailla alpapimi causanajunchi.

Jehová Diosca alpata rurashca jipaca gentecuna, animalcuna alpapi causachunmi indita, urcucunata, mar yacuta, huaicu yacucunatapash rurarca.

Jipamanga ¿imatata ashtahuan rurarca? Jehová Diosca nircami: Jihuacunata, imapash fucuj yuracunata, shuj yuracunatapash ruragrini nishpa. Shinami cai Alpapica shuj shuj frutacuna, sisacuna, shuj plantacunapash tiai callarirca. Jehová Diosca alasyu animalcunata, yacupi causaj animalcunata, alpata llucashpa rij animalcunata, shuj animalcunatapashmi rurarca. Shinallata conejocunata, shuj uchilla animalgucunata, elefantecuna cuenda shuj jatun animalgucunatapashmi rurarca. Quiquinga ¿maijan animalgutata ashtahuan gushtangui?

Chai jipaca, Jehová Diosca pai rurashca punda angeltaca nircami: ‘Ñucanchishnalla rijchaj genteta rurashun’. Shinapash gentecunaca na animalcunahuan igual cagrijurcachu. Gentecunaca paicunallata imatapash ruraita, parlaita, cushilla caita, Taita Diosta mañaitapashmi ushana carca. Cai alpata, animalcunatapashmi cuidagrinajurca. Punda jarica ¿pita carca? ¿Yachangapaj munapanguimanllu?