Jéhovah Nzapa la asara e. Lo la lo sara aye kue, aye so lê ti e apeut ti bâ nga na aye so lê ti e apeut ti bâ ape. Kozo si lo sara aye so lê ti e apeut ti bâ, lo sara a-ange mingi mingi. A-ange ayeke tongana nyen? Jéhovah asara ala ala kpa lo. E lingbi ti bâ ala pëpe gï tongana ti so e lingbi ti bâ Nzapa pëpe. Kozo ange so Jéhovah asara lo aga zo ti mungo maboko na lo. Ange ni so amû maboko na Jéhovah na ngoi so lo sara atongoro, lâ, nze, aye so ayeke na lê ti nduzu nga na tanga ti aye kue. Mbeni oko ti aye ni so ayeke sese so ayeke pendere mingi si e yeke na ndö ni so.

Na pekoni, Jéhovah aleke sese nzoni ti tene azo na anyama aduti na ndö ni. Lo sara si lumière ti lâ asu na ndö ti sese ni. Lo sara ahoto, akota ngu-ingo nga na akota ngu.

Nyen la asi na pekoni? Jéhovah atene: ‘Mbi yeke sara apere, akete keke nga na akota keke.’ Tongaso, gbâ ti mara ti alê ti keke nde nde, akugbe ti kasa nga na afleur akomanse ti kono. Na pekoni Jéhovah asara anyama nde nde kue, anyama so ayeke huru na lê ti nduzu, anyama so ayeke fono na yâ ti ngu nga na anyama so ayeke hara na sese. Lo sara ambeni kete nyama, na tapande alapin nga lo sara akota ni, na tapande adoli. Nyama wa la mo ye lo mingi?

Na pekoni, Jéhovah atene na kozo ange ni, lo tene: “Zia e sara zo.” Azo ayeke ti ala nde na anyama. Azo ayeke na ndara ti créé  aye. Ala lingbi ti sara tënë, ti he ngia nga ti sambela. Ala yeke bâ lege ti sese nga na anyama. Mo hinga zo wa la ayeke kozo koli? Zia e bâ.