Kalaqinonkehu Magano Yihowaati. Baalankare kalaqinohu isooti; isi kalaqinori giddo mitu illete leellannoho, mitu kayinni dileellannoho. Isi illete leellannore kalaqara albaanni lowo sokkaasine kalaqino. Sokkaasine maatiro afootto? Sokkaasine Yihowara soqqantannoreeti; insa iso labbanno. Magano illetenni laˈˈa didandiineemmo; hatteente gede sokkaasineno laˈˈa didandiineemmo. Yihowa umo kalaqino sokkaasinchi Isi ledo loosino. Hakku sokkaasinchi Yihowa beeddahe, pilaaneettanna wolere kalaqi yannara ledosi loosino. Yihowa kalaqino pilaaneetta giddo mitte uullate; uulla heeˈrate baxisanno bayichooti.

Hakkiinni Yihowa uulla saadatenna mannaho heeˈrate injiitanno gede assino. Yihowa arrishsho fultanno gede assino. Isi ilaalla, baaranna lagga kalaqino.

Yihowa hakkiinni aanche maa kalaqinoro afootto? Isi togo yiino: ‘Hayisso, muronna haqqe kalaqeemmo.’ Hakkiinni addi addi laalo, kaashshunna awawu fuli. Hakkunni gedensaanni Yihowa saadanna cea kalaqino; kuri giddo mite buubbannote, mite waa daakkannote, mite gagasunni hadhannote, wole kayinni kukkubbitanni hadhannote. Yihowa shiimmaadda saada lawishshaho, hilleessa kalaqino; qoleno jajjabba saada, lawishshaho daaniicho kalaqino. Ati roore baxatto saada hiitteeti?

Hakkiinni Yihowa umo kalaqino sokkaasincho, ‘Amo mancho kalanqona’ yiino. Mannu saadate gedeeha diˈˈikkino. Mannu mitore loosa dandaanno. Mannu coyiˈra, osoˈlanna huuccatto assiˈra dandaanno. Mannu  uullanna saada towaatanno. Yihowa umo kalaqino manchi ayetiro afootto? Aantanno xaggera tenne daafira ronseemmo.