Jehovah Ndranahary ro namoro antsika. Ie ro namoro ty raha iaby, ndre ty raha hitantsika ndre ty raha tsy hitantsika. Namboatsy anjely maro biby tse ie, zay vo nanao ty raha hafa. Hainao va anjely zao? Anjely zao mpanompo-Ndranahary, namboariny manahaky azy. Tsy afaky mahita a Ndranahary tsika. Tsy afaky mahita anjely koa zany tsika. Nisy anjely raiky zay tse niforoniny voalohany, le bakeo nanampy azy. Nampeany Jehovah lafa namoro masoandro, basia, noho ty raha hafa iaby. Tany soasoa ipetrahantsika toy koa raiky.

Bakeo namboarini-Jehovah soa tany toy, amy zay afaky mipetraky etoy ty biby noho ty olombelo. Nalefany etoy koa hazavàni-masoa- ndro iny. Nanao vohitsy noho rano voho vavarano koa ie.

Ino koa ty nataoni-Jehovah lafa vita rezay? Nivola ie hoe: ‘Hampitiry akata noho hazo voho raha hafa aho.’ Le nanomboky nitiry ty voankazo, legimy, noho ty folera sankarazany. Bakeo Jehovah namoro ty biby iaby. Ao ty mitily, ao ty milano anaty rano any, le ao koa ty milaly. Namboariny iaby ndre ty kelikely manahaky valavo io, ndre ty bevata manahaky elefanta rey. Ino ty biby farany teanao?

Bakeo nivola tamy anjely niforoniny voalohany iny Jehovah hoe: “Ndao tsika hamboatsy olo.” Tsy manahaky biby io tsika olombelo, satria afaky mamoro raha sady afaky mivola, homehy, noho mivavaky. Afaky mikarakara ty tany noho ty biby koa tsika. Hainao va  hoe ia ty olo voalohany tan-tany etoy? Ndao hohenteantsika zay.