Jehova Nkulunkulu nguMdali wetfu. Wadala konkhe lokukhona, lokufaka ekhatsi tintfo lesitibonako nalesingatiboni. Ngaphambi kwekutsi adale tintfo lesingatibona, Jehova wadala tingilosi letinyenti kakhulu. Uyatati yini tingilosi? Tingilosi tidalwa Jehova latidala tafana naye. Angeke sikhone kutibona njengobe singakhoni kumbona naNkulunkulu. Ingilosi yekucala Jehova layidala yaba ngumsiti wakhe. Lengilosi yasita Jehova ngesikhatsi adala tinkhanyeti, emaplanethi, kanye nato tonkhe letinye tintfo. Lenye yalamaplanethi ngumhlaba, lokulikhaya letfu lelihle.

Jehova walungisa umhlaba kuze bantfu netilwane baphile kuwo. Wadala lilanga kuze likhanyisele umhlaba. Wadala tintsaba, lwandle nemifula.

Kwase kwentekani? Jehova watsi: ‘Ngitawuveta tjani, titjalo kanye netihlahla.’ Kwacala kumila tinhlobonhlobo letinyenti tetitselo, tibhidvo, kanye netimbali. Jehova wabese udala tonkhe tilwane​—tilwane letindizako, letihlala emantini, letihumako naletinwabutelako. Wadala tilwane letincane letifaka ekhatsi bologwaja kanye naletinkhulu njengendlovu. Ngusiphi silwane lositsandzako wena?

Jehova wakhuluma nengilosi yekucala watsi: “Asente bantfu.” Bantfu bebatawehluka etilwaneni. Bebatawukhona kwenta tintfo. Bebangakhona kukhuluma, kuhleka kanye nekuthantaza. Bebatawunakekela  umhlaba kanye netilwane. Uyamati yini umuntfu wekucala kutsi bekungubani? Asesibone.