Mawu Yehuwa kai Měndariading i kitẹ. I Sie někoạ kěbị haghi, apang kẹ̌kasilong dingangu tawe kẹ̌kasilong i kitẹ. Su tempong bědang tawe někoạ kěbị apa kẹ̌kasilong i kitẹ, i Sie někoạ lawọ malaekatẹ̌. Apa i kau masingkạ malaekatẹ̌ ene apa? Malaekatẹ̌ ene kai ělang i Yehuwa. Yehuwa někoạ si sire mẹ̌sul᷊ung dingang’E. I kitẹ tawe makasilo si sire, kere i kitẹ tawe makasilo Mawu. Malaekatẹ̌ humotong nikoạ i Yehuwa nẹ̌tul᷊ung si Sie někoạ manga binatang, planet, dingangu kěbị barang bal᷊inẹ. Sěmbaụ bọu lawọ planet ene kai dunia, tampạ masadadạ nipẹ̌tanạkeng i kitẹ.

Bọu ene, Yehuwa něnadia dunia tadeạu binatang dingangu taumata botonge mẹ̌tanạ sene. I Sie někoạ matangěllo něnualagẹ̌ dunia. I Sie někoạ bukidẹ̌, laudẹ̌, dingangu sal᷊ụ.

Apa lai nikoạ i Yehuwa? I Sie naul᷊ị, ’Iạ sarung měkoạ manga onasẹ̌, sasuang, dingangu kakaluang.’ Haghing bua, dukụ, dingangu manga bungang lai timuwo. Bọu ene, Yehuwa někoạ binatang—apang tụtělạ, lụhomang, dingangu měbẹ̌biahẹ̌ su ral᷊ungu akẹ. I Sie lai někoạ manga binatang dararodọ, kere kelinci, dingangu binatang gẹ̌guwạ, kere gajah. I kau puluang su binatang sude?

Bọu ene Yehuwa nẹ̌bera su malaekatẹ̌ humotong, ”Mahịe i kitẹ měkoạ taumata.” Taumata nẹ̌tatěntang bọu binatang. Taumata botonge měkoạ sěmbaụ hal᷊ẹ̌, mẹ̌bisara, luměge, dingangu mẹ̌doa. I sire sarung měngurusẹ̌ dunia dingangu binatang.  Apa i kau masingkạ i sai taumata humotong? Mahịe i kitẹ mědeạ sasimbahe.