Jeobá Dios nindxu̱u̱ bi̱ Niʼniáanʼ. Ikhaa niʼni xúgíʼ dí nduʼyáá ga̱jma̱a̱ dí tséʼyáá. Nákhi rí xóó tséʼni rí nduʼyáálú, ikhaa niʼniin mbaʼin wéñuʼ ángeles. Lá natayáá tsíin ñajúnʼ ángeles ráʼ. Ni̱ndxu̱ún xa̱bu̱ bi̱ Jeobá niʼniin ga̱jma̱a̱ ni̱ndxu̱ún xó má ikhaa. Ikháanʼ na̱nguá xóo mbuʼyáá Jeobá ga̱jma̱a̱ xándoo mbuʼñún ángeles. Timbáa ángel bi̱ Jeobá niʼnii ni̱jkha̱nú nimbáyúu. Ikhaa nimbáyúu Jeobá maʼni a̱ʼgua̱a̱n, planetas ga̱jma̱a̱ i̱ʼwáʼ dí rígá. Ikháanʼ kuwáanʼ náa mbá planeta rúʼko̱, Ku̱ba̱ʼ rí mitsaan wéñuʼ.

Nda̱wa̱á Jeobá niʼni mújúúnʼ ku̱ba̱ʼ mu xujkhúʼ gajmiún xa̱bu̱ makuwa ikhí. Niʼni dí agiuʼ a̱jkha̱ʼ mambiʼi náa tsu̱du̱u̱ ku̱ba̱ʼ ma̱ngaa niʼni kúbá, lamáa ga̱jma̱a̱ mañu.

Dí nirígá nda̱wa̱á rá. Jeobá niʼthí: “Mani raxa, iná ga̱jma̱a̱ ixi̱”. Ikha jngó ku̱ba̱ʼ nigíʼdu̱u̱ nixná mbaʼa enii xndú taun, verduras ga̱jma̱a̱ ri̱ʼi̱. Jeobá ma̱ngaa niʼnii xúgínʼ enii xujkhúʼ: Bi̱ nagún rijma̱a̱, bi̱ nagún awúu̱n iyaʼ ga̱jma̱a̱ bi̱ nuxmajtamijná. Niʼnii xujkhúʼ majkhinʼ, xóo xtuájen, mbaʼwi̱i̱n, xóo elefantes. Tsáa xujkhúʼ bi̱ nanigia̱ʼ ikháánʼ rá.

Ikhú Jeobá niʼthúu̱n ángel bi̱ niʼnii ginii: “Muʼni̱i̱ xa̱biya̱”. Xa̱bu̱ maʼni mixtiʼkun ki xóo xujkhúʼ. Ma̱ndoo muni wíi mbaʼa dí nandún, muthi, mundu̱ʼwa̱ ga̱jma̱a̱ mutakáñii Dios. Muñewa̱a̱n ku̱ba̱ʼ ga̱jma̱a̱  muñewu̱u̱n xujkhúʼ. Natayáá tsáa ninindxu̱u̱ timbáa xa̱biya̱ ráʼ. Guʼyáá.