Maromak Jeová mak ita-nia Kriadór. Nia kria buat hotu, buat neʼebé ita bele haree no labele haree. Antes kria buat hotu neʼebé ita bele haree, nia kria uluk anju barak tebes. Ó hatene anju mak saida? Anju mak kriatura neʼebé Jeová kria hanesan ho nia. Ita labele haree anju, hanesan ita mós labele haree Maromak. Anju primeiru neʼebé Jeová kria mak ajuda nia atu kria fitun, planeta, no buat seluk tan. Planeta ida mak mundu, ita-nia hela-fatin neʼebé furak.

Tuirmai Jeová prepara mundu atu ema no animál bele hela. Nia halo loro-matan atu fó naroman mai mundu. Nia mós kria foho, tasi, no mota.

Saida tan mak Maromak kria? Jeová dehan: ‘Haʼu sei kria duʼut, ai-horis no ai-hun sira.’ Tan neʼe mak modo, ai-funan no ai-fuan oioin komesa moris. Tuirmai Jeová kria animál hotu, animál neʼebé semo, animál neʼebé moris iha bee laran, no mós animál neʼebé dolar. Nia kria animál neʼebé kiʼik, hanesan nehek, no animál neʼebé boot, hanesan elefante. Ó gosta liu animál saida?

Tuirmai Jeová koʼalia ba anju primeiru: “Mai ita kria ema.” Ema la hanesan ho animál. Ema bele inventa buat oioin. Ema bele koʼalia, hamnasa, no mós halo orasaun. Sira sei tau matan  mundu no animál sira. Ó hatene ema primeiru mak sé? Mai ita haree toʼok.