I Jehovah ty Mpamorogne antika. Ie ty nanao ze kila raha, ndra ty raha treantika ndra ty raha tsy treantika. Namboatse anjely maro reke taloha ty namboara’e ty raha treantika. Ino o anjely zao? O anjely zao, fagnahy tsy trea maso manahake i Jehovah sady natao’e mitovy ama’e. Nanjare mpagnampe i Jehovah ty anjely raike namboare’e voaloha’e. Nagnampe aze hanao ty kintagne, ty planeta naho ze raha ila’e o anjely iohoe. Raike amo o planeta rehoe ty tane fanjaka misy antikagne toy.

Natao i Jehovah soa ty tane toy, mba hiaigna ty ndaty naho ty biby. Nanao ty masoandro reke hagnazava ty tane toy. Namboatse vohitse, riake, naho renerano ka reke.

Ino ka ty natao’e? Hoe reke: ‘Hisiako ahetse maintso naho raha mitiry vaho hatae ty ambone tane ey.’ Nitiry amy izay ty voan-katae, ty legioma, naho ty folera isan-karaza’e. Namboatse biby maro ka reke, misy ty mitiligne, milaly, milagno, naho mikisake. Bitro ty biby kedekede namboare’e, le elefanta ty biby bey. Ino ty biby tea’o?

Hoe ty Jehovah tamy i anjely voaloha’ey tie: ‘Andao hamboatse ndaty.’ Tsy mitovy amo o bibio o ndatio, satria afake mamboatse raha, mirehake, mihehe naho mivavake. Iareo ty hikarakara o taneo  naho o bibio. Fanta’o vao tie ia ty lahilahy voaloha’e? Andao hagnente izay.