Иегова Бурган — бистиң Чаяакчывыс-тыр. Ол көстүр-даа, көзүлбес-даа чүүлдү чаяаган. Эгезинде ол хөй-хөй ангелдерни чаяап каан. Ангелдер дээрге кымнарыл ол, билир сен бе? Ол дээрге Иегованың бараалгакчылары-дыр. Олар аңаа дыка дөмей. Бурганны ышкаш, оларны база көрүп шыдавас бис. Эң бир дугаар ангел Бурганның дузалакчызы апарган. Ол ангел Иеговага сылдыстарны, планеталарны база өске-даа чүүлдерни чаяарынга дузалажып турган. Ол планеталарның бирээзи — бистиң чурттап турар чараш Черивис-тир.

Иегова Черни дириг амытаннарга болгаш кижилерге белеткеп берген. Ол хүннү черже чырып турар кылдыр чаяап каан. Оон ыңай Иегова дагларны, океаннарны болгаш хемнерни чаяаган.

Оон чүнү кылган? Иегова: «Мен оът-сигенни, чечектерни, ыяштарны чаяап каар мен» — дээн. Ынчан черге янзы-бүрү ногаа-аймаа, кат-чимис, чечектер өзүп эгелээн. Ооң соонда Бурган соястап, маңнап, ужуп, эштип чоруур шупту дириг амытаннарны чаяап каан. Чижээ, ол койгун дээн ышкаш бичии амытаннарны база чаан дээн ышкаш улуг амытаннарны чаяаган. А сээң ынак дириг амытаның кандыгыл?

Ооң соонда Иегова эң бир дугаар ангелге мынча дээн: «Кижиден чаяап аалам». Кижилер дириг амытаннардан ылгалыр ужурлуг турган. Иегова кижилерни чугааланып, чогаадып, каттырып,  мөргүп билир болзун деп күзээн. Олар чер болгаш дириг амытаннар дээш база сагыш човаар турган. Бир дугаар кижини билир сен бе? Ону көрүптээлем.