Jaʼ Jpasvanej kuʼuntik li Jeovae. La spas li kʼusi mu xkiltike xchiʼuk li kʼusi xkiltike. Kʼalal muʼyuk toʼox spasoj li kʼusitik xkiltik ta balumile, baʼyel la spas epal anjeletik. ¿Mi xanaʼ kʼu yelan li anjeletike? Jaʼik kuxlejaletik ti xkoʼolajik tajek kʼuchaʼal li Jeovae. Pe li voʼotike, mu xkiltik li Jeova mi jaʼuk xkiltik li anjeletik taje. Li baʼyel anjel la spase, jaʼ koltaat ta spasel li kʼusitike, jech kʼuchaʼal li estreyaetike, planetaetik xchiʼuk li yan kʼusitike. Li voʼotike nakalutik ta jun planeta ek, taje jaʼ li kʼupil sba balumile.

Ta tsʼakale, li Jeovae la xchapan balumil sventa xuʼ te xnakiik krixchanoetik xchiʼuk li chonbolometike. La spas kʼakʼal sventa xakʼ xojobal li ta balumile. Jech xtok la spas vitsetik, nab xchiʼuk li ukʼumetike.

Vaʼun, ¿kʼusi kʼot ta pasel ta tsʼakal? Xi laj yal li Jeovae: «Ta xkakʼ chʼiuk tsʼiʼleletik, vomoletik xchiʼuk teʼetik». Jaʼ yuʼun lik chʼiuk jeltos sat teʼetik, itajetik xchiʼuk nichimetik li ta balumile. Jech xtok la spas jeltos chonbolometik ti snaʼ xvilike, ti snaʼ xnuxinajike xchiʼuk skotol li kʼusi xkilet ta balumil chanavike. La spas bikʼtal chonbolometik kʼuchaʼal konejoetik xchiʼuk mukʼtik chonbolometik jech kʼuchaʼal li elefanteetike. ¿Kʼusi chonbolomal mas chakʼupin?

Li Jeovae xi laj yalbe li baʼyel anjele: «Jpastik krixchano». Pe li krixchanoetike muʼyuk bu ta xkoʼolajik xchiʼuk li chonbolometike, yuʼun li stukike xuʼ oy kʼusi smeltsanik, xloʼilajik, stseʼinik xchiʼuk spasik  orasion. Xchiʼuk xtok li krixchanoe chchabi li balumil xchiʼuk li chonbolometike. ¿Mi xanaʼ buchʼu li baʼyel vinike? Jkʼeltik batel.