Jehovah oyubo poto mamwonya i kabedo ma kilwongo ni Eden. Poto meno onongo opong ki ature, yadi ki lee mapatpat. Lacen Lubanga ocweyo laco mukwongo Adam ki apwa, ka dong okuto yamo me yweyo i ume. Tika ingeyo gin mutimme? Laco odoko dano makwo! Jehovah omiyo bot Adam twero me loyo poto meno, dok Lubanga omiye tic me cako nying lee ducu.

Jehovah omiyo cik ma pire tek bot Adam. En owaco bot Adam ni: ‘Itwero camo nyig yadi ducu ma tye i poto kany ento tye yat acel keken ma omyero pe icam nyige. Ka icamo nyig yat meno, ci ibito woko.’

Lacen, Jehovah owaco ni: ‘Abicweyo ngat ma bibedo lakony bot Adam.’ Lubanga oweko Adam onino woko, ci en okwanyo cogo laknget Adam ka ocweyo ki dako. Nying dakone kilwongo ni Kawa. Adam ki Kawa  aye jo me ot mukwongo. Itamo ni Adam owinyo nining i kare ma kimiye dako mamwonya? Adam obedo ki yomcwiny adada ci owacci: ‘Nen ngat ma Jehovah ocweyo ki cogo lakngeta! Man dano macal ki an.’

Jehovah owaco bot Adam ki Kawa ni gunywal gunya gupong lobo. Jehovah onongo mito ni gunong yomcwiny i tic kacel me loko lobo ducu wek odok paradic, nyo kabedo ma mwonya, calo poto me Eden. Ento yubbe pe ocobbe kit man. Ingeyo pingo? Wabinyamo lok meno i dul ma lubo man.