Yéhôva a bi sal wom i homa ba bé sébél le Éden. Wom u bé nyonok ni mbônji, ni bie, ni binuga. Mbus, Djob a bi hek munlôm nu bisu, le Adam, ni nluñ ték. A hue nye nhébék u niñ ikété mben yé môl. Baa u nyi kii i bi bôña i mbus? Ha nyen mut a bi yila hégél i gwé niñ! Yéhôva a bi ti Adam mbegee i sal ni i tééda wom u, Djob a bi kal ki nye le a ti binuga gwobisôna môl.

Yéhôva a bi ti Adam mbén i tôbôtôbô. A bi kal Adam le: ‘U yé kunde i je matam ma bie gwobisôna mu wom. Ndi, u jek bañ litam li e yada i tôbôtôbô. Ibale u nje jo, u ga wo.’

I mbus ngéda, Yéhôva a kal ki le: ‘Me ga hégél Adam nhôla.’ Ni Djob a boñ le ndip hilo hi gwel Adam, ni Djob a héya mbai Adam yada inyu hek nwaa. Jôl jé li bé le Éva. Adam bo Éva ba bi yila lihaa li bisu. Kii Adam a bi nôgda inyu muda a bi tip  kôhna? Adam a bi kon maséé ngandak, a kal le: ‘Nun-ki i nwet Yéhôva a nhek ni mbai yem! Éé! Nunu nyen a yé pôna yem.’

Yéhôva a bi kal Adam bo Éva le ba gwal bon, ni le ba yônôs hisi. A bé gwés le ba sal ntôñ, inyu yilha hisi hiosôna paradis, tole loñge wom, kiki wom Éden. Ndi, mam ma bi tagbe bé hala. Inyuki? Di ga kôhna ndimbhe mu yigil i noñ.