Zoova dili fie kun lika nga be flɛ i kɛ Edɛnin’n nun lɔ. Fie sɔ’n nun’n, flɛli nin waka nin nnɛn mun be sɔnnin kpa. I sin’n, Ɲanmiɛn yili klɔ sran klikli’n. Be flɛ i kɛ Adan. Ɔ fali fa yɛ ɔ fa yili i-ɔ. Kpɛkun ɔ fitɛli i bue’n nun. ?Kɛ ɔ yoli sɔ’n, a si sa ng’ɔ juli’n? Kɛ Ɲanmiɛn fitɛli i bue’n nun’n, yɛ ɔ ɲannin nguan-ɔn! Zoova fali fie’n wlali Adan sa nun naan ɔ nian su. Kpɛkun ɔ seli i kɛ ɔ tɔn nnɛn mun be kwlaa be dunman.

Zoova mannin Adan mmla cinnjin kpa kun. Ɔ seli i kɛ: ‘A kwla di waka mun be kwlaa be su mma mun, saan kunngba cɛ yɛ ɔ fataman kɛ a di i su mma’n niɔn. Sɛ a di’n, á wú.’

I sin’n, Zoova seli kɛ: ‘Ń má yí Adan i ukafuɛ.’ Ɲanmiɛn yoli maan Adan lafili pɔɔ kpa. Kpɛkun ɔ fali Adan i nvɛnma kun fa yili bla kun mɛnnin i. Be flɛ bla sɔ’n kɛ Ɛvu. Adan nin Ɛvu yɛ be ti awlobo klikli’n niɔn. Kɛ Adan wunnin i yi’n i klun jɔli dan kpa.  I sɔ’n ti’n, ɔ seli kɛ: ‘Ɛn-ɛɛn! Nga li ti kɛ min sa. Nian like nga Zoova w’a fa min nvɛnma’n w’a yo’n!’

Zoova seli Adan nin Ɛvu be kɛ be wu ba naan be trɛ asiɛ’n su. Ɔ kunndɛli kɛ be di junman likawlɛ naan asiɛ wunmuan’n kaci lika klanman, annzɛ fie klanman kɛ Edɛnin fie’n sa. Sanngɛ like nga Ɲanmiɛn sunnzunnin’n, w’a kpɛnman su. ?Ngue ti-ɔ? Like suanlɛ ng’ɔ bɛ i sin’n, ɔ́ wá yíyí nun.