Naggibo si Jehova nin sarong hardin sa lugar na inaapod na Eden. Kadakul nin mga tinanom na namumurak, kahoy, saka hayop sa hardin na iyan. Tapos, ginibo nin Diyos an inot na lalaking si Adan hali sa alpog, dangan hinangusan niya an dungo kaini. Aram mo kun ano an nangyari? Nagin buhay na tawo an lalaki! Ki Adan ipinaasikaso ni Jehova an hardin, asin sinabihan niya ini na pangaranan an gabos na hayop.

Sarong mahalagang pagbuot an itinao ni Jehova ki Adan. Sinabi niya ki Adan: ‘Puwede mong kakanon an bunga kan gabos na kahoy. May saro lang na dai puwede. Pag kinakan mo an bunga kaiyan, magagadan ka.’

Pag-abot nin panahon, nagsabi si Jehova: ‘Magibo ako nin saro na magigin katuwang ni Adan.’ Pinaturog na marhay nin Diyos si Adan, tapos ginamit niya an saro sa mga gusok, o tulang sa tagiliran, ni Adan ’nganing maglalang nin agom para saiya. Eva an nagin pangaran kan babaying ini. Si Adan asin Eva an nagin inot na  pamilya. Ano an namatian ni Adan sa saiyang agom? Ugmahon si Adan, kaya nakapagsabi siya: ‘Hilinga ining linalang ni Jehova hali sa sakong gusok! Nagkaigwa man giraray ako nin kapareho!’

Sinabihan ni Jehova si Adan asin Eva na magkaaki asin panuon an daga. Gusto niyang magin maugma sinda na magkaibanan na nagtatrabaho para gibuhon na paraiso, o magayon na parke, an bilog na daga, arog kan hardin nin Eden. Pero dai iyan nangyari. Taano? Maaaraman ta ini sa sunod na istorya.