Jehova ye nankɔ dɔ labɛn yɔrɔ dɔ la min be weele ko Edɛn. O nankɔ tun fanin lo yiriw, filɛruw ani kongosogow ni bɛgɛnw na. O kɔ, Ala ye bɔgɔ ta ka cɛɛ fɔlɔ Adama dan ani ka ninakili fiyɛ ka don a nunwow la. I b’a lɔn min kɛra wa? O cɛɛ kɛra mɔgɔ ɲɛnama ye! Jehova ko Adama k’o nankɔ ladon. A ko Adama ka tɔgɔ la kongosogow ni bɛgɛnw bɛɛ la.

Jehova ye koo dɔ fɔ ka gwɛlɛya Adama ma. A y’a fɔ Adama ye ko: ‘I be se ka yiriw bɛɛ deenw dumu fɔɔ yiri kelen dɔrɔn, min be dan na tɔɔw la. N’i y’o yiri deen dumu, i bena sa.’

Kɔfɛ, Jehova ko: ‘Ne bena Adama dɛmɛbaga dan.’ A ye sinɔgɔba bila Adama la, k’a galagakolo kelen bɔ ka Adama ka muso dan n’o ye. O muso tɔgɔ tun ko Awa. Adama ni Awa kɛra denbaya fɔlɔ ye. Adama ye mun miiri a muso koo la? A koo  diyara Adama ye fɔɔ a y’a fɔ ko: ‘ A’ y’a filɛ Jehova ye min kɛ ni ne galagakolo ye! Sisan kɔni, nin ye ne ɲɔgɔn dɔ lo ye.’

Jehova ko Adama ni Awa ka deenw wolo ka dugukolo fa. A tun b’a fɛ u ka baara kɛ ɲɔgɔn fɛ ninsɔndiya la ka dugukolo bɛɛ kɛ alijɛnɛ ye i n’a fɔ Edɛn nankɔtu. Nka koow ma kɛ ten. Mun na do? An bena o ye kalansen nata la.