NUPINPLỌN 2
Jiwheyẹwhe Dá Sunnu Tintan po Yọnnu Tintan Po
Jehovah wleawuna jipa de do fie nọ yin yiylọdọ Edẹni. Jipa lọ gọ́ na vounvoun, atin po kanlin lẹ po. Enẹgodo, Jiwheyẹwhe dá sunnu tintan lọ, Adam, sọn kọ́gudu mẹ bo gbọ do awọntinslo etọn lẹ mẹ. Be a yọ́n nuhe jọ bọdego ya? Sunnu lọ lẹzun gbẹtọ gbẹ̀te! Jehovah ze jipa lọ do alọmẹ na Adam bo dọna ẹn dọ ni do yinkọ na kanlin lẹpo.
Jehovah dosẹ́n titengbe de na Adam. E dọna Adam dọmọ: ‘A sọgan dù sinsẹ́n atin lẹpo tọn, amọ́ atin vonọtaun de tin he a ma dona dù sinsẹ́n etọn. Eyin a dù sinsẹ́n atin enẹ tọn, a na kú.’
To nukọn mẹ, Jehovah dọmọ: ‘N’na basi alọgọtọ de na Adam.’ Enẹwutu, Jiwheyẹwhe hẹn Adam nado damlọn yìkànmẹ bo yí dopo to adàjahú Adam tọn lẹ mẹ do basi asi na ẹn. Yinkọ yọnnu lọ tọn wẹ Evi. Adam po Evi po lẹzun whẹndo tintan. Numọtolanmẹ tẹwẹ Adam tindo gando asiyọyọ etọn go? E vivi na Adam sọmọ bọ e dọmọ: ‘Pọ́n nuhe Jehovah yí adàjahú ṣie do basi! N’wá mọ yẹn nkọ dopo din lo!’
Jehovah dọna Adam po Evi po dọ yé ni ji ovi lẹ bo gọ́ aigba ji. E jlo dọ yé ni wazọ́n to pọmẹ nado hẹn aigba lọ pete zun paladisi, kavi jipa whanpẹnọ de, taidi jipa Edẹni tọn nkọ. Amọ́, nulẹ ma wá yì domọ. Etẹwutu? Mí na plọn nususu gando enẹ go to weta he bọdego mẹ.
“Mẹhe dá yé sọn bẹjẹeji basi yé sunnu de yọnnu de.”—Matiu 19:4
