Yehowa gaw sun langai galaw nna dai shara hpe Edin sun ngu shaga ai. Dai sun hta nampan ni, hpun ni hte dusat ni hkum hkra nga ai. Dai hpang Karai Kasang gaw ga nhpu hte shawng nnan na lasha Adam hpe hkrang shachyaw nna shi a ladi de nsoi nsa kawut bang dat ai. Hpa byin wa ai hpe chye ai kun? Shi gaw asak hkrung ai masha byin wa ai. Yehowa gaw sun hpe yu lajang na matu Adam hpe lit jaw da nna, dusat ni yawng hpe amying jaw na matu mung tsun ai.

Yehowa gaw Adam hpe grai ahkyak ai tara jaw ai. Shi gaw Adam hpe ndai hku tsun ai: ‘Laksan tawn da ai hpun hta lai nna kaga hpun ni a namsi yawng hpe mai sha ai. Dai hpun hta na namsi hpe sha yang gaw nang si na re.’

Dai hpang Yehowa ndai hku tsun ai: ‘Adam a matu ningrum ningtau galaw ya na.’ Karai Kasang gaw Adam hpe grai yup pyaw hkra galaw nna, shi a garep nra langai hte shi a matu madu jan hpe hpan ya dat ai. Shi a mying gaw Ewa re. Adam yan Ewa gaw shawng nnan na dinghku byin wa  ai. Adam gaw shi a madu jan hte seng nna gara hku hkamsha ai kun? Adam grai kabu nna ndai hku tsun ai: ‘Yehowa gaw nye a nra hta na galaw ya ai hpe yu u. Shi mung ngai zawn masha re.’

Yehowa gaw Adam yan Ewa hpe shan a kashu kasha ni hte mungkan ga hpe hpring hkra galaw na matu tsun ai. Mungkan ting hpe hparadisu, shing n rai Edin sun zawn grai tsawm ai shara byin hkra kabu gara let rau galaw na matu Yehowa ra sharawng ai. Raitim dai zawn n byin wa ai. Hpa majaw kun? Dai lam hpe hpang na daw hta hkaja lu na re.