Jehova aahaarĩirie mũgũnda mũthaka wetagwo Edeni. Mũgũnda ũcio waiyũrĩte mahũa, mĩtĩ, na nyamũ. Thutha ũcio Ngai akĩũmba mũndũ wa mbere ũrĩa wetagwo Adamu kuuma rũkũngũ-inĩ, agĩcoka akĩmũhuhĩrĩria mĩhũmũ maniũrũ-inĩ make. Hihi nĩ ũĩ gwathire atĩa? Adamu aatuĩkire mũndũ wĩ muoyo. Jehova nĩ aamũheire wĩra wa kũmenyerera mũgũnda ũcio na akĩmwĩra ahe nyamũ ciothe marĩĩtwa.

Jehova nĩ aaheire Adamu watho wa bata mũno. Aamwĩrire ũũ: ‘No ũrĩe matunda ma mũtĩ o wothe tiga o ũmwe tu. Hĩndĩ ĩrĩa ũkaarĩa matunda ma mũtĩ ũcio, no ũgakua.’

Thutha ũcio Jehova akiuga: ‘Nĩ ngũũmbĩra Adamu mũteithia.’ Aatũmire Adamu akome toro mũnene, agĩcoka akĩruta rũbaru rwake na akĩmũũmbĩra mũtumia wetagwo Hawa. Adamu na Hawa nĩo maarĩ famĩlĩ ya mbere. Adamu  aaiguire atĩa nĩ ũndũ wa kũũmbĩrũo mũtumia? Aakenire mũno nginya akiuga ũũ: ‘Ta rora kĩrĩa Jehova aathondeka kuuma rũbaru-inĩ rwakwa! Rĩu kaĩ ũyũ ahaana o ta niĩ-ĩ.’

Jehova eerire Adamu na Hawa maciarane na maiyũrie thĩ. Eendaga marutithanie wĩra marĩ hamwe wa gũthondeka thĩ ĩtuĩke paradiso o ta ũrĩa mũgũnda wa Edeni wahaanaga. No ũguo tiguo gwathire. Nĩkĩ? Nĩ tũkwĩruta ũndũ ũcio gĩcunjĩ-inĩ kĩrĩa kĩrũmĩrĩire.