Yehoba wajimine bujimi mu mpunzha itelwa’mba Edena. Mu buno bujimi mwajinga maluba avula bingi, bichi ne banyama. Kepo Lesa alengele muntu mutanshi, Adama, kufuma ku lukungu ne kupuya muya wa bumi mu myona yanji. Wayuka kyamwekele nyi? Uno muntu waikele na bumi. Yehoba wabikile Adama mu buno bujimi. Lesa wamupele mwingilo wa kutumba banyama bonse mazhina.

Kepo Yehoba apele Adama muzhilo wanema bingi. Wamwambijile’mba: ‘Ku bichi byonse bya mu bujimi wakonsha kujako, kufumyakotu kichi kimo. Inge ukajeko ku kino kichi, ukafwa.’

Mu kuya kwa moba, Yehoba waambile’mba: ‘Mbena kulengela Adama nkwasho.’ Walengejile Adama kulaala tulo tukatampe ne kumufumya lubavu. Kepo Lesa alengele mwanamukazhi ku uno lubavu ye afumishe kwi Adama. Jizhina janji wajinga Evwa. Adama ne Evwa bo bajinga batanshi kulenga kisemi. Adama waumvwine byepi byo bamupele mwanamukazhi? Waumvwine bingi bulongo,  kabiji waambile’mba: ‘Yehoba walenga muntu wawama kufuma ku lubavu wami! Uno ujitu byonka byo nji.’

Yehoba wabuujile Adama ne Evwa kusema ne kuyuzha ntanda. Wakebelenga’mba bakekalenga na lusekelo ne kwingijila pamo kwalula ntanda ke paladisa, nangwa’mba ntanda yawama bingi byonkatu byajinga bujimi bwa Edena. Bino kechi byo byo kyajinga ne. Mambo ka? Tukafunda byavula mu kitango kyalondelapo.