Jiova mek wan gadin na wan ples we dɛn kɔl Idɛn. Di gadin bin gɛt bɔku flawa dɛn, tik dɛn, ɛn animal dɛn. Dɔn Gɔd mek di fɔs man frɔm dɔti we de na grɔn, ɛn i blo briz na in nos. Yu sabi wetin apin afta dat? Di man gɛt layf! Jiova tɛl Adam fɔ kia fɔ di gadin, ɛn i tɛl am bak fɔ gi nem to ɔl di animal dɛn.

Jiova bin gi Adam wan impɔtant lɔ. I bin tɛl Adam se: ‘Yu kin it frɔm ɔl di tik dɛn we de na di gadin te yu satisfay. Bɔt as fɔ di sɛns tik we de sho gud ɛn bad, yu nɔ fɔ it frɔm am bikɔs di de we yu it frɔm am, natin nɔ go pwɛl am, yu go day.’

Dɔn Jiova tɔk bak se: ‘A go mek sɔmbɔdi we dɛn tu go de, fɔ ɛp am.’ I mek Adam slip dip dip wan. Dɔn i pul wan pan Adam in rib ɛn mek wan uman fɔ am. In nem na Iv. Adam ɛn Iv na di fɔs famili we Jiova mek. Aw Adam bin fil bɔt in nyu  wɛf? Adam bin rili gladi ɛn i tɔk se: ‘Luk wetin Jiova mek frɔm mi rib we i gi mi! Rili, dis na pɔsin lɛk mi!’

Jiova bin tɛl Adam ɛn Iv fɔ mek dɛn bɔn pikin dɛn te dɛn bɔku ɛn ful-ɔp di wɔl. I bin want dɛn fɔ ɛnjɔy we dɛn de wok togɛda fɔ mek di wan ol wɔl bi Paradays, ɔ lɛk fayn pak, jɔs lɛk di gadin we bin de na Idɛn. Bɔt nɔto dat bin apin. Wetin mek? Wi go lan mɔ bɔt dat na di nɛks lɛsin.