တၢ်မၤလိ ၂
ကစၢ်ယွၤတ့လီၤ ပှၤဟီၣ်ခိၣ်ဖိအဆိကတၢၢ်ခံဂၤ
ယဟိဝၤယွၤတ့လီၤဝဲကရၢၢ်လၢ အဃံအလၤတကရၢၢ်, တၢ်ကိးဝဲအမံၤလၢ ဧ့ၤဒ့ၣ်တၤသၣ်အလီၢ်လီၤ. လၢကရၢၢ်အပူၤန့ၣ် ပှဲၤဝဲဒီးဖီအကလုာ်ကလုာ်, သ့ၣ်ထူၣ်ဝၣ်ထူၣ်တဖၣ်ဒီး ဆၣ်ဖိကီၢ်ဖိအကလုာ်ကလုာ်လီၤ. ဝံၤဒီး ကစၢ်ယွၤတ့လီၤ ပိာ်ခွါအဆိကတၢၢ်တဂၤ ဒီးအမံၤမ့ၢ်ဝဲစီၤအၤဒၣ်လီၤ. ကစၢ်ယွၤတ့လီၤအီၤဒ်လဲၣ်န့ၣ် မ့ၢ်နသ့ၣ်ညါဧါ. ကစၢ်ယွၤတ့လီၤဝဲပိာ်ခွါတဂၤအံၤလၢ ဟီၣ်ခိၣ်ကမူၣ်ဒီး အူနုာ်ဝဲကလံၤလၢ အနါဒ့ပူၤလီၤ. ဒီးပိာ်ခွါတဂၤအံၤကဲထီၣ် ပှၤဟီၣ်ခိၣ်ဖိအဆိကတၢၢ်တဂၤလၢ အိၣ်ဒီးအသးသမူန့ၣ်လီၤ. ယဟိဝၤယွၤမၢစီၤအၤဒၣ်ကွၢ်ထွဲဝဲကရၢၢ်လၢ အဃံအလၤတကရၢၢ်အံၤဒီး မၢစ့ၢ်ကီးအီၤလၢကကိးန့ၢ်ဝဲ ဆၣ်ဖိကီၢ်ဖိခဲလၢာ် အမံၤလီၤ.
ယဟိဝၤယွၤဟ့ၣ်လီၤဝဲ စီၤအၤဒၣ်တၢ်သိၣ်တၢ်သီလၢ အရ့ဒိၣ်တခါလီၤ. ကစၢ်ယွၤတဲဘၣ် စီၤအၤဒၣ်လၢ– ‘ကယဲၢ်သ့ၣ်သူဝၣ်သၣ်န့ၣ် နအီၣ်အီၤသ့ခဲလၢာ်လီၤ. ဘၣ်ဆၣ် သ့ၣ်တထူၣ်လၢအအိၣ်လၢ ကရၢၢ် အသးကံၢ်ပူၤန့ၣ် အီၣ်အသၣ်တဂ့ၤ. နမ့ၢ်အီၣ်န့ၣ် နကသံလီၤ.’
လၢခံ ယဟိဝၤယွၤတဲဝဲလၢ– ‘ယကတ့န့ၢ်စီၤအၤဒၣ် အတံၤသကိးတဂၤလၢ ကမၤစၢၤအီၤလီၤ.’ ဒီးကစၢ်ယွၤမၤမံ စီၤအၤဒၣ်လီၤ. ဝံၤဒီးကစၢ်ယွၤဟံးန့ၢ် စီၤအၤဒၣ်အဂုာ်ဃံတဘိ ဒ်သိးကတ့လီၤဝဲပိာ်မုၣ်တဂၤလၢ စီၤအၤဒၣ်အဂီၢ်လီၤ. စီၤအၤဒၣ်ကိးန့ၢ်အမါအမံၤလၢ နီၢ်အံၣ်အုလီၤ. နီၢ်အံၣ်အုဒီးစီၤအၤဒၣ် ကဲထီၣ်ဝဲဟံၣ်ဖိဃီဖိ အဆိကတၢၢ်တဒူၣ်လၢ ဟီၣ်ခိၣ်ချၢလီၤ. ဖဲစီၤအၤဒၣ်န့ၢ်ဘၣ်အမါအခါ အသးမၤ အသးဒ်လဲၣ်. စီၤအၤဒၣ်သးခုဖးဒိၣ်ဒီး တဲဝဲလၢ– ‘ယဟိဝၤယွၤဟံးန့ၢ်ယဂုာ်ဃံတဘိဒီး တ့လီၤဝဲပိာ်မုၣ်တဂၤလၢ ယဂီၢ်လီၤ.’
ယဟိဝၤယွၤမၢနီၢ်အံၣ်အုဒီး စီၤအၤဒၣ်လၢ ကဘၣ်ထီၣ်ဖိထီၣ်လံၤဒီး ကဘၣ်မၤပှဲၤဟီၣ်ခိၣ်ဒီဘ့ၣ်လၢ အဝဲသ့ၣ်အဖိအလံၤလီၤ. ကစၢ်ယွၤအဲၣ်ဒိးလၢ အဝဲသ့ၣ်ကမၤသကိးတၢ်လၢ တၢ်သူၣ်ဖှံသးညီအပူၤလၢ ကမၤကဲထီၣ်ဝဲ ဟီၣ်ခိၣ်ဒီဘ့ၣ်လၢ ပၤရဒံစူး ဒ်သိးကလီၤဂာ်ဒ် ဧ့ၤဒ့ၣ်တၤသၣ်လီၢ်အသိးလီၤ. ဘၣ်ဆၣ် ခဲအံၤန့ၣ် ဘၣ်မနုၤအဃိ ဟီၣ်ခိၣ်ဒီဘ့ၣ် တကဲထီၣ်ပၤရဒံစူးလဲၣ်. ဘၣ်ဃးဒီးတၢ်ဂ့ၢ်အံၤန့ၣ် ပကမၤလိအါထီၣ်လၢ တၢ်မၤလိလၢခံတခါလီၤ.
“ပှၤလၢအတ့လီၤပှၤကညီလၢအခီၣ်ထံးန့ၣ် တ့လီၤအီၤပိာ်ခွါတဂၤ, ဒီးပိာ်မုၣ်တဂၤ” လီၤ.—မးသဲ ၁၉:၄
