Yave wavanga mpatu mosi yayikilwanga vo Edene. E mpatu yayi yazala yakala ye mvuma, nti ye bulu. I bosi, Nzambi wavanga muntu muna mbundukutu a ntoto yo vumwina muna mazunu mandi. Nga ozeye dina diavangama? O muntu wakituka wamoyo. Yave wamvana e nkumbu a Adami. Wamvana mpe salu kia lunga-lunga e mpatu a Edene. Nzambi wamvovesa vo kavana e nkumbu kwa bulu yawonso.

Yave wavana Adami nsiku wamfunu kikilu. Wamvovesa vo: ‘Olenda kwaku dia e bundu ya nti miawonso. Kansi vena yo nti mosi wamfunu. Kufwete dia bundu kia nti wau ko. Avo odidi e bundu kia nti wau, fwa ofwa.’

Kuna kwalanda, Yave wavova vo: ‘Nzolele vangila Adami o nsadisi.’ Muna kuma kiaki, walekesa Adami wosola kia tulu. I bosi, wakatula luvati lumosi lwa Adami yo vangila lo nkento ona wakituka se  nkaz’a Adami. E nkumbu andi Eva. Adami yo Eva bakituka se kanda diantete dia wantu. Nga Adami wayangalela nkento bamvana? Elo. Wavova ye kiese kiawonso vo: ‘Tala dina Yave kavangidi muna luvati lwame! Owau mbwene muntu ofwanane yame.’

Yave wavovesa Adami yo Eva vo bawuta wana yo lungila e nza. Nzambi wazola vo Adami yo Eva bakitula e nza yawonso se paradiso nze una wakala e mpatu a Edene, fulu kiambote-mbote. Kansi e nza ke yakituka paradiso ko. Ekuma? Tubaka e mvutu za kiuvu kiaki muna kapu kilanda.