Jehova naalukisize simu mwa sibaka sesibizwa Edeni. Mwa simu yeo nekutezi lipalisa, likota, ni lifolofolo. Hasamulaho, Mulimu abupa mutu wapili yena Adama fa liluli mi abululela moya mwa lingo zahae. Kana mwaziba zeneezahezi hasamulaho? Aba mutu yapila! Mi Jehova abeya Adama mwa simu ya Edeni kuli aibabalele mi Mulimu amubulelela kuli abeye lifolofolo mabizo.

Jehova afa Adama taelo ya butokwa. Kihaa li ku yena: ‘Wakona kuca kwa miselo ya likota kaufela za mwa simu, kwandaa kota iliñwi feela. Kakuli hauka ca kwa muselo wa kota yale, ukashwa luli.’

Hasamulaho, Jehova ali: ‘Nikaezeza Adama mutusi.’ Kiha lobaza Adama buloko bobutuna, mi Mulimu aitusisa leliñwi la makupo a Adama kumubupela musali. Libizo lahae neli Eva. Adama ni Eva baba bona lubasi lwapili. Adama naaikutwile cwañi ka za musalaa hae yanaasazo bupiwa yo? Adama naatabile hahulu kuli mane  naabulezi kuli: ‘Hamubone zabupile Jehova kuzwelela fa likupo laka! Yo cwale waswana ni na.’

Jehova naabulelezi Adama ni Eva kuli babe ni bana ni kuli bataze lifasi. Naabata kuli baikole kusebelisana hamoho kueza lifasi kaufela kuba paradaisi, kamba sibaka sesibuheha, sina feela simu ya Edeni. Kono lika nelisikaba cwalo. Libaka? Lukaituta zeñata mwa tuto yetatama.