Jehová kichijchijki se xochimili ipan Edén. Nopaya onkayaya miak xochitl, kuatinij uan tlapialmej. Teipa, toTeotsij kichijchijki nopa achtoui tlakatl, Adán. Kichijchijki ika tlali uan teipa kiyakailpitski. ¿Tijmati tlake panok teipa? ¡Nopa tlakatl pejki moojolinia! Jehová kiiljuik Adán ma kimokuitlaui nopa xochimili uan ma kintokaxtlali nochi tlapialmej.

Jehová kinauatik Adán se tlamantli tlen tlauel ipati, kiiljuik: “Uelis tijkuas itlajka tlen ueli kuauitl, san se kuauitl itlajka amo xijkua. Tlaj tijkuas itlajka nopa kuauitl, timikis”.

Teipa Jehová kiijtok: “Nijchijchiuilis Adán se akajya katli kipaleuis”. Uajka kichijki Adán kuali ma kochi uan ika se ielchikiomiyo kichijchiuilik isiua. Motokaxtik Eva. Adán uan Eva elkej katli achtoui mosenkajkej. ¿Tlake kiyolmatki Adán kema kiitak  isiua? Tlauel yolpajki uan kiijtok: “¡Ya ni tlen Jehová kichijchijki ika se noelchikiomiyo! ¡Nojkia eli kej na!”.

Jehová kiniljuik Adán uan Eva ma kinpiakaj miakej ininkoneuaj uan ma kitemitikaj Tlaltipaktli. Kinekiyaya ma yolpakikaj uan sentik ma kichiuakaj nochi Tlaltipaktli se xochimili. Maske toTeotsij kinekiyaya nochi Tlaltipaktli ma eli kej nopa xochimili Edén, amo kiampa mochijki. ¿Tijmati kenke? Nopa tikitasej ipan nopa seyok tlamachtili.