Jehova okwa toto oshikunino mehala hali ithanwa Eden. Oshikunino osha li shu udha oongala, omiti nosho wo iinamwenyo. Kalunga okwa shiti omulumentu gwotango, Adam, montsi yevi nokwe mu fudhile ombepo yomwenyo momayulu. Owu shi kutya oshike sha ningwa po? Omulumentu okwa ningi omunamwenyo. Jehova okwa pe Adam iilonga yokutonatela oshikunino, nokwe mu lombwele a luke iinamwenyo ayihe omadhina.

Jehova okwa pe Adam ompango ya simana. Okwa lombwele Adam a ti: ‘Oto vulu okulya iiyimati yomiti adhihe, kakele komuti gumwe ngoka gwi ikalekelwa. Ngele owa li ko kugwo, oto ka sa.’

Konima yethimbo Jehova okwa ti: ‘Otandi shitile Adam omukwathi.’ Okwa kotheke Adam oomposi oondhigu, nokwa longitha olupati lwaAdam, opo e mu shitile omukiintu. Edhina lye oEva. Adam naEva oya ningi uukwanegumbo wotango. Mbela Adam okwa li u uvitile ngiini  omukadhi? Adam okwa li a nyanyukwa nokwa popi a ti: ‘Tala kwaashoka Jehova a shiti okuza molupati lwandje! Omuntu nguka okwa shitwa a fa ndje.’

Jehova okwa lombwele Adam naEva ya vale aanona noyu udhithe evi. Okwa li a hala ya nyanyukilwe okulonga pamwe, ya ninge evi alihe oparadisa nenge oshikunino oshiwanawa, ngaashi oshikunino shaEden. Ihe iinima inayi ke enda we nawa ngaashi ya li yi na okweenda. Omolwashike mbela? Otatu ki ilonga oshindji montopolwa tayi landula.