Jiihóvah éí Íídengi dáʼákʼeh áyiilaa. Chʼilátah hózhóón, tsin naazkaadii índa naaldlooshii áłʼąą ádaatʼéii hazlı̨́ı̨́ʼ. Áádóó áłtsé hastiin Ádam łeezh bitsʼą́ą́dóó áyiilaa, biyol yee hánííʼ góneʼ bee iináanii yee ííyol. Áádóó haa hoodzaa? Diné hiná silı̨́ı̨́ʼ! Jiihóvah éí Ádam dáʼákʼeh bee hóhólníihgo áhoolaa. Naaldlooshii tʼáá ałtso bízhiʼ ádadííliił hoʼdooʼniid.

Jiihóvah éí bee hazʼáanii łaʼ Ádam yił ííshjání áyiilaa. Ádam kóyidííniid: ‘Tsin naazkaadígíí bineestʼąʼ tʼáá ałtso bąąhdóó íyą́ą doo, ndi tʼááłaʼí tsin tsʼídá doo bąąhdóó adííyı̨́įł da, háálá bąąhdóó ííníyą́ąʼgo tʼáá aaníí dadíítsaał.’

Tʼahádóó éí Jiihóvah ání: ‘Ádam éí háká análwoʼ dooleełii há ádeeshłííł.’ God éí Ádam yiʼiiłhaazh, áádóó łaʼ bítsą́ą́ʼ hayíítą́ éí asdzání yee áyiilaa. Éí Íiv woosyeʼ. Ádam dóó Íiv éí áłtsé ahéskéego áyiilaa. Ádam éí beʼasdzą́ą́ silı̨́įʼii haitʼéego yaa  tsídeezkééz? Yaa bił hóozhǫǫdgo ádííniid: ‘Jiihóvah éí díí shitsʼinígíí yee asdzání áyiilaa. Áko díí tʼáá shí shináłtʼé!’

Jiihóvah éí Ádam dóó Íiv nahasdzáán bikááʼgóó nihaʼáłchíní hooleełgo kʼeeʼąą noohtʼı̨́įł doo yidííniid. Tʼáá Ííden áhootʼéhígi átʼéego nahasdzáán tʼáadoo bee honóoshónígo ádahodoohłííł. Ákondi tʼáadoo ákódajiidzaa da. Biniinaanígíí éí nááwóltaʼígíí biiʼ baa ídahwiidiilʼááł.