Jeova walinga otyikunino pomphangu imwe itiwa Endene. Motyikunino ankho muna ononthemo ononyingi, nomiti ominyingi, no vinyama. Konyima Huku atungu omulume wotete, utiwa Andau, wemutunga nonthata afili momayulu ae. Ove utyii oityi tyamoneka po? Omulume akala omunthu una omuenyo! Jeova waavela Andau otyilinga tyo kuyawisa kotyikunino, nokuluka ovinyama aviho.

Jeova apopila Andau okuti: ‘Upondola okulia ovinyango viomiti aviho. Mahi kuna omuti uhapondola okulia. Inkha ulia kotyinyango tyomuti oo monkhi.’

Konyima, Jeova apopi okuti: ‘Ame mandyitungu omukuatesiko wa Andau.’ Huku alalesa Andau, iya emupolo olupati atungu nalo omukai wa Andau. Enyina liae o Eva. Andau na Eva avakala ovalinepi votete. Oñgeni Andau elitehelela etyi amona omukai wae? Andau  ahambukwa ati: ‘Tala etyi Jeova alinga nolupati luange! Ou omunthu nelifwa nae.’

Jeova atolela Andau na Eva okuti mamukala novana iya amuyulisa ohi. Huku ankho uhanda vaundape kumwe nehambu opo valinge ohi aiho ikale omphangu Yombembwa, ngo tyikunino tyo Endene. Mahi ovipuka kaviakalele ngetyi ankho tyihandwa. Omokonda yatyi? Matulilongesa tyo monthele mailandulako..