Nanggaway garden si Jehova diad lugar ya tinawag ya Eden. Dakdakel ditan so rosas, kiew, tan ayayep. Insan, angala na dabok so Dios tan ginawa to so unonan laki, si Adan. Sinibokan na Dios iray abot na eleng nen Adan. Antam no antoy agawa? Sikatoy nagmaliw ya mabilay a too! Imbaga nen Jehova ed si Adan ya asikasoen to so garden tan ngaranan to so amin ya ayayep.

Walay importantin ingganggan nen Jehova ed si Adan. Imbaga nen Jehova: ‘Amin a bunga na kiew et sarag mon kanen, aleg labat imay bunga na espisyal ya kiew. Ta no mangan kay bunga to, ompatey ka.’

Insan imbaga nen Jehova: ‘Igawaan koy Adan na ontulong ed sikato.’ Kanian pinaugip ton maong si Adan, insan angala na sakey ya taglang nen Adan tan ginawa ton bii ya asawa nen Adan. Say ngaran to et Eva. Si Adan tan Eva so sankaunaan ya pamilya. Anto kasi alikna nen Adan nen wala lay asawa to? Malikeliket kanian  kuan to: ‘Balibali ginawa nen Jehova manlapud taglang ko! Wala la natan so kaparak ya too!’

Imbaga nen Jehova ed si Adan tan Eva ya mananak ira tan panoen day dalin. Labay ton maliket ira tan mantulongan ira ya gawaen a paraiso o balibalin park so interon dalin, singa say garden ed Eden. Balet ag-itan agawa. Akin kasi? Naamtaan ta diad onsublay ya istorya.