Jehova muak eenen Goaden opp eene Städ, waut Eden heet. En dän Goaden wieren een deel Bloomen, Beem un Tieren. Dan muak Gott dän ieeschten Maun, Adam. Hee muak dän von Ieed un pust en dän siene Näs nenn. Weetst du, waut dan passieed? Daut wort een läwendja Mensch! Jehova wull haben, Adam sull no dän Goaden oppaussen un aule Tieren eenen Nomen oppjäwen.

Jehova jeef Adam een besondret Jeboot. Hee säd: “Du kaust von jieda Boom siene Frucht äten, bloos von eenen nich. Wan du de Frucht von dän besondren Boom äten woascht, dan woascht du stoawen.”

Lota säd Jehova: “Ekj woa Adam eenen Helpa moaken.” Gott muak Adam deep em Schlop un neem eene Rebb von dän toom dän eene Fru moaken. Dee heet Eva. Adam un Eva worden de ieeschte Famielje. Woo jinkj Adam daut, aus hee nu eene Fru haud?  Adam wia soo schaftich, daut dee säd: “Kjikjt, waut Jehova von miene Rebb jemoakt haft! Nu es doa wäa, waut soo es aus ekj.”

Jehova säd to Adam un Eva, see sullen Kjinja haben, daut de Ieed voll Menschen wort. Jehova wull haben, dee sullen schaftich toopschaufen un de gaunze Ieed to een Paradies, ooda schmocken Goaden moaken, soo aus de Goaden Eden. Oba daut wort nich soo. Wuarom nich? Daut woa wie en daut näakjste Kapitel lieren.