Jehová xubʼan jun utzalaj ulew ubʼiʼ Edén. Pa wajun kʼolbʼal kʼo kʼi kotzʼiʼj, e cheʼ xuqujeʼ e chikop. Tekʼuriʼ, Dios xubʼan ri nabʼe achi, Adán. Xubʼan rukʼ ulew tekʼuriʼ xuya kaqiqʼ pa utzaʼm. ¿La awetaʼm jas chi xkʼulmatajik? ¡Ri achi xkʼojiʼ ukʼaslemal! Jehová xubʼij che Adán che kuchajij ri utz kʼolbʼal xuqujeʼ che kukoj kibʼiʼ konojel ri e chikop.

Jehová xuya jun taqanik che nim ubʼanik che Adán. Xubʼij che: «Katkunik katij uwach apachike cheʼ, are kʼu kʼo jun, nim ubʼanik. We katij ri uwach wajun cheʼ riʼ, katkamik».

Qʼaxinaq chi jun tiempo, Jehová xubʼij: «Kinbʼan jun toʼl rech ri Adán». Rumal laʼ xubʼano che Adán xqaj che jun nimalaj waram xuqujeʼ xukoj jun chke ri ukʼalkʼax rech xubʼan ri rixoqil. Ubʼiʼ Eva. Adán xuqujeʼ Eva e areʼ ri nabʼe familia. ¿Jas xunaʼ Adán are chiʼ xril ri rixoqil? Sibʼalaj  kkikotik xubʼij: «¡Are waʼ ri xubʼan ri Jehová rukʼ jun chke ri nukʼalkʼax! ¡Kimik kʼo chi jun junam wukʼ!».

Jehová xubʼij chke ri Adán xuqujeʼ Eva che kekʼojiʼ kalkʼwal xuqujeʼ kkinojisaj ri uwach Ulew. Xraj che kekikotik are chiʼ junam kechakun che ubʼanik jun utzalaj kʼolbʼal che ronojel ri uwach Ulew. Jun kotzʼiʼjalaj kʼolbʼal, junam rukʼ ri utzalaj Edén. Are kʼu jeʼ ta xel waʼ. ¿Jasche jeʼ taj? Pa ri jun chik kʼutunem kqil na.