Eden nishqan sitiuchömi Jehoväqa juk huertata rurarqan. Tsëchöqa mëtsika wëtakuna, montikuna y animalkunam karqan. Tsëpitaqa Adan jutiyoq nunatam puntata rurarqan. Allpapita rurarirmi senqanman pükëkurqan. Tsënam, ¡kawar qallëkurqan! Jehoväqa tsë huertata cuidanampaq y animalkunapa jutinta churanampaqmi Adanta nirqan.

Jehoväqa kënö nirmi Adanta alleq cläru mandarqan: “Llapan plantakunapa frütantam mikïta puëdinki, peru juk plantapa frütantam sïqa mana mikunëkitsu, porqui tsë plantaqa wakimpita jukläyam. Tsë plantapa frütanta mikurqa, wanunkim”.

Tsëpitanam Jehoväqa, “Adanpaq juk yanapaqnin rurapushaq” nirqan. Nïkurmi Adanta punukäratsirqan, y juk costillanta jorqarirmi, tsë costillampita warmin rurapurqan. Ëvam jutin karqan. Pëkunam puntata patsakaq familia kayarqan. ¿Imanötaq Adanqa sientikurqan warminta  rikëkur? Alläpam kushikurqan, y kënömi nirqan: “¡Pëtaqa costilläpitam Jehovä rurashqa! ¡Kananqa manam japallänatsu kashaq!”.

Adantawan Ëvataqa wamrankuna kanampaq y patsa juntanqanyaq mirayänampaqmi Jehoväqa nirqan. Ishkan kushishqa trabajarnin entëru patsata juk huertaman tikratsiyänantam munarqan. Eden huertanömi shumaq kanan karqan. Peru manam tsëta lograyarqantsu. Qateqnin willakïchömi imanir mana lograyanqanta rikärishun.