Jehová Diosca Edenpimi sumaj huertata rurarca. Chai huertapica sisacuna, yuracuna, animalitocunami tiyarca. Qꞌuipaca punta cꞌaritaca allpamanta rurashpami singapi samaita pꞌucurca. ¿Chaipica imashi tucurca? Paica causai callarircami. Chai runaca Adán shutimi carca. Paitaca Edén huertata cuidachun, tucui animalcunata shutichichunmi Diosca mandarca.

Diosca, ‘cai huertapi tiyaj tucui yuracunapi pꞌucushcacunataca micunguilla. Huerta chaupipi tiyaj yuramantaca ama micunguichu. Chai yuramanta micushpaca huañunguimi’ nishpami Adantaca mandarca.

Qꞌuipaca Jehová Diosca, ‘Adanpajmi shuj ayudajta ruragrini’ nircami. Chaimantami Adanta dormichishpa paipaj costillamanta shuj huarmita rurarca. Paipaj shutica Evami carca. Adán, Evami punta familia carca. Paipaj huarmita ricushpaca ¿Adanca ima shinashi sintirirca?  Achcata cushicushpami, ‘ñuca costillamantami Diosca paita rurashca. Ñuca layami can’ nirca.

Diosca Adanta Evataca, ‘achca huahuacunata charishpa cai pachapi jundanguichij’ nircami. Tandalla trabajashpa cai allpata shuj paraisota rurashpa cushilla causachunmi Diosca munarca. Cai allpaca Edén huerta shinami tucuna carca. Pero mana Dios munashca shina tucurcachu. ¿Imamanta? Catij leccionpimi yachashun.