Jehová Diosmi Edén huertata ruwaran. Chay huertapin karan askha t’ikakuna, sach’akuna, animalkunapas. Chay qhepamanmi Diosqa Adanta ruwaran. Allpamanta ruwaspan senqanpi phukuykuran. ¿Iman chay ratopi pasaran? ¡Adanmi kausayta qallariran! Jehová Diosmi Adanta kamachiran Edén huertata cuidananpaq, animalkunamanpas sutita churananpaq.

Jehová Diosmi Adanman juj importante kamachikuyta qoran. Niranmi: “Atinkin llapa sach’akunamanta frutakuna mijuyta, juj sach’amantan ichaqa amapuni mijunkichu. Chay frutata mijunki chayqa wañupunkin”, nispa.

Chay qhepamanmi Jehová Diosqa niran: “Adanpa yanapaqninta ruwasaq”, nispa. Jinan Adanta misk’ita puñurachispa jujnin wajtanta orqospa esposanta ruwaran. Sutinmi karan Eva. Adanwan Evawanmi ñaupaq kaq familia karanku. ¿Imaynan Adán sientekuran esposanta rikuspa? Anchatan kusikuran, jinan niran: “¡Ancha  munay warmitan jujnin wajtaymanta Diosqa ruwarusqa! ¡Kusisqan kashani noqa jina runata rikuspay!”, nispa.

Jehová Diosmi Adanta Evatawan niran askha wawayoq kanankupaq, allpantinman junt’anankupaqpas. Diosqa munaranmi kusisqa kausanankuta, allpanchistapas paraisoman tukuchinankuta. Ichaqa manan chhaynachu kashan. ¿Imarayku? Qatimuq capitulopi chaymanta yachasun.