О Иегова стердя шукарно садо и ԥэндя пэ кадэва ҭан Эдемо. Андэ кадэва садо сас бут цвиторя, витки и животни. Тоди о Дэл создал лэ манушэс, лэ Адамос. О Дэл стердя лэс анда прахо, ԥурдя лэсти андо нак, и ӷанэс, со сас тоди? О мануш ля тэ жувэл! О Иегова ԥэндя лэ Адамости тэ диқэл пала садо. Инке о Дэл ԥэндя, кай во тэ приԥэнэн кажнонэ животнонэсти алав.

О Адамо трэбуй сас тэ ритярэл ек законо. О Иегова ԥэндя лэсти: «Ха плодоря па всаворэ витки. Но андо садо исин кати ек витка, па сави нащи тэ хас. Сар ту хаса пар латэ плодоря, мэрэса».

Тоди о Иегова ԥэндя: «Камав, кай лэ Адамостэ тэ авэл кодэва, ко поможыя лэсти». О Дэл стердя, кай о Адамо фартэ тэ засовэл. Тоди во ля лэстар о рэбло и стердя анда кадэва рэбло лэ Адамости хулая, ла Ева. О Адамо и Ева сас само пэрво ери. Чалеля лэ Адамости лэсти  хулаи? Лэсти кадя чалеля, кай во анда оди ԥэндя: «Нисо пэсти! Диқэн, кас о Иегова стердя анда мэрно рэбло! Акана исин мануш, сар мэ!»

О Иегова ԥэндя лэ Адамости и ла Евати, кай лэндэ тэ авэн бэятцэ и кай и мануша, савэ жана лэндар, тэ жувэн па вся ԥув. Во камля, кай кадэва ери тэ стерэл, кай па вся ԥув тэ авэл раё или шукарно парко, саво шолпэ по садо Эдемо. Сави дэ лащи дила! Но вся вижыля най кадя. Со тердяпэ? Амэ уӷанаса пала када май дур.