Maganu Edenete yinanniwa kaashshu base qixxeessino. Hattee kaashshu base giddo addi addi daraaro, haqqenna saada no. Hakkiinni Maganu Addaami yinanni mancho bushshunni kalaqe sanote widoonni qole foole worinosi. Hakkuyi gedensaanni ikkinore afootto? Manchu heeshshote noo kalaqama ikkino! Maganu, Addaami kaashshu base towaatara iso hakko worino; qoleno ‘Baalante saadara suˈma fushshi’ yiinosi.

Yihowa Addaami togo yiino: ‘Kaashshu basera noo haqqe giddo mitte agurranna baalante haqqe laalo iti. Ittooti yoommo haqqicho laalo itittoro kayinni reyatto.’

Gedensaanni Yihowa togo yiino: ‘Addaamira kaaˈlitannosita kalaqeemmosi.’ Maganu, Addaami takki yee goxanno gede assi; hakkiinni Addaami midaadinni miqicho haaˈre minaama kalaqinosi. Ise suˈmi Heewaniiti. Addaaminna Heewani umi minaannanna minaama  ikkino. Addaami minaama afiˈriti hiitto hagiidhinoro afootto? Isi lowo geeshsha hagiidhe togo yiino: ‘Tini Yihowa miqichiˈyanni kalaqinote! Ane labbannota afiˈroommo.’

Yihowa, Addaaminna Heewani, ‘Ille, ilamme gobba woˈme’ yiinonsa. Yihowa insa uulla, Edenete kaashshu base gedeeta gannate woy biifado base assara hasiˈrino. Ikkollana Maganu hedinori diwoˈmino. Mayira? Aantanno fooliishshora tenne daafira ronseemmo.