Jehova wenta insimu endzaweni lebitwa ngekutsi yi-Edeni. Lensimu beyinetimbali, tihlahla netilwane. Nkulunkulu wabese udala indvodza yekucala, Adamu, wambumba ngelutfuli lwemhlabatsi wase uphefumulela umoya wekuphila emakhaleni akhe. Uyati kutsi kwase kwentekani? Lendvodza yaba ngumuntfu lophilako! Jehova wayinika umsebenti wekunakekela lensimu, futsi wayitjela kutsi yetse tonkhe tilwane emagama.

Jehova waniketa Adamu umyalo lobalulekile. Watsi ku-Adamu: ‘Ungadla titselo tato tonkhe tihlahla letisensimini ngaphandle kwesitselo sesihlahla sekwati lokuhle nalokubi, ngobe mhlazana usidla, uyawukufa nekufa.’

Kamuva Jehova watsi: ‘Ngitawentela Adamu umsiti.’ Nkulunkulu wenta Adamu kutsi ehlelwe butfongo lobukhulu, wase utsatsa lolunye lwetimbambo takhe kute amentele umfati. Ligama lakhe bekungu-Eva. Bo-Adamu na-Eva baba ngumndeni wekucala. Wativa njani Adamu ngemfati wakhe? Adamu wajabula  kakhulu waze watsi: ‘Buka kutsi Jehova wente ini ngelubambo lwami! Ekugcineni, lona sewulitsambo lematsambo ami.’

Jehova watjela bo-Adamu na-Eva kutsi batale bantfwana futsi bagcwalise umhlaba. Abefuna basebente ndzawonye kuze bente umhlaba wonkhe ube lipharadisi, nobe indzawo lenhle lefanana nensimu yase-Edeni. Kepha akuzange kwenteke loko. Leni? Sitawufundza lokwengetiwe esehlukweni lesilandzelako.