Yehuwa někoạ sěmbaụ taman su tampạ isẹ̌sěbạ Eden. Su taman ene piạ lawọ bungang, kalu, dingangu binatang. Bọu ene, Yehuwa někoạ taumata humotong bọu awul᷊ẹ̌ kụ něniụ singongo sarang irunge. Apa i kau masingkạ apa nariadi tuhụe? Taumata ene něbiahẹ̌! Arenge Adam. Yehuwa něngoro si Adam pěngurusẹ̌ taman kụ pěgělị areng su kěbị binatang.

Yehuwa něgělị si Adam sěmbaụ atorang penting. I Sie naul᷊ị si Adam, ’I kau botonge kumaěng bua bọu kěbị kakaluang sini, katewe piạ sěmbaụ kalu kụ buane tawe wotonge kanengangu. Mạeng i kau kumaěng ene, i kau sarung mate.’

Bọu ene Yehuwa naul᷊ị, ’Iạ měgělị si Adam sěngkatau mẹ̌tatul᷊ung.’ Mawu někoạ i Adam nẹ̌tikị mal᷊ěna-l᷊ěnabẹ̌, bọu ene něngal᷊ạ sěmbaụ duhing husụ i Adam kụ někoạ kawing gunang i Adam. Arenge Hawa. I Adam dingangi Hawa nakoạ keluarga kahumotongange.  Kerea pěndang i Adam su tempong nakaěbạ kawing? I Adam sěbạe mal᷊uasẹ̌ kụ naul᷊ị, ’Ini i sie, seng nikoạ i Yehuwa bọu duhing husụku! I sie mẹ̌sul᷊ung iạ!’

Yehuwa něngoro si Adam dingangi Hawa tadeạu piạ anạ kụ pěmenẹ dunia. Mawu mapulu i sire mal᷊uasẹ̌ su tempong měhal᷊ẹ̌ sěngkasio gunang měkoạ dunia mariadi firdaus, arau taman masadadạ, kere Taman Eden. Katewe, apa nariadi tuhụe bal᷊inẹ kere ikẹ̌kapulung Mawu. Kawe nụe? I kitẹ makasingkạ ene su běke tuhụe.