Jehowa akasale jardɛ ya dimɛna lo dihole diakelamɛka Ɛdɛna. Jardɛ shɔ yakalolanɛ la alɛmbɔlɛmbɔ, esongo ndo waa nyama. Oma laasɔ, Nzambi akatonge pami ka ntondo, Adama oma lo ditshu ndo akafufe lomu l’ɛhɛmbɛ ande. Onde wɛ mbeyaka kɛnɛ kakatombe? Pami kɛsɔ akakome onto lasɛna! Jehowa akasha Adama ɔkɛndɛ wa nɔngɔsɔlaka ekambɔ k’Ɛdɛna ndo Nzambi akawotɛ dia nde mbɔlɛ nyama tshɛ nkombo.

Jehowa akadjɛ Adama ɔlɛmbɛ w’ohomba efula. Nde akatɛ Adama ate: ‘Wɛ koka ndɛ elowa w’oma l’esongo tshɛ onyake oma l’osongo ɔmɔtshi wa laande. Naka wɛ ndɛ elowa w’oma l’osongo ɔsɔ, wɛ ayovɔ.’

L’ɔkɔngɔ diko, Jehowa akate ate: ‘Dimi layanga tongɛ Adama okimanyedi.’ Nde akalasha Adama djɔ ya baku, ndo oma laasɔ, Nzambi akɔshi lohandju la Adama dia tongɛ Adama wadi. Lokombo lande Eva. Adama l’Eva mbakakome nkumbo ka ntondo. Ngande  wakayaoke Adama lo dikambo dia wadɛnde l’oyoyo ɔsɔ? Adama aki l’ɔlɔ w’efula diakɔ diakandate ate: ‘Ohenda kɛnɛ kambosala Jehowa la lohandju lami! Ɔnɛ mɛtɛ ekɔ onto lele oko dimi.’

Jehowa akatɛ Adama l’Eva dia vɔ mbota ana ndo ndodia nkɛtɛ. Nde akalange dia vɔ ngɛnangɛna dia nkamba kaamɛ la nde dia mbetɛ nkɛtɛ k’otondo paradiso, kana parkɛ k’olangala efula woho waki ekambɔ k’Ɛdɛna. Koko akambo kosalema ngasɔ. Lande na? Tayeka akambo efula lo tshapita yayela.