Yehova wangunozga munda muchigaŵa cho chadanikanga kuti Edene. Mumunda uwu mwenga maluŵa ndi vimiti vinandi ndipuso nyama. Pavuli paki Chiuta wangupanga munthu wakwamba Adamu kutuliya ku dongu ndipu wanguphutiriya muvuchi mumphunu zaki. Kumbi uziŵa cho chinguchitika? Munthu yo wanguja wamoyu! Yehova wangukambiya Adamu kuti wawoneriyengi munda wo kweniso wadani mazina nyama zosi.

Yehova wangupasa Adamu dangu lakukhumbika ukongwa. Iyu wangukambiya Adamu kuti: ‘Ungarya vipasu va muvimiti vosi kupatuwaku chimoza pe chapade. Asani uryengi chipasu cha muchimiti chenichi, ufwengi.’

Pavuli paki, Yehova wanguti: ‘Adamu ndimupangiyengi wakumuwovya.’ Chiuta wangugonesa Adamu tulu tikulu ndipu wanguto mbaŵara yaki  yakurwandi ndi kumupangiya munthukazi. Zina laki wenga Eva. Adamu ndi Eva ndiwu angupanga banja lakwamba. Kumbi Adamu wanguvwa wuli wati wawona muwolu waki mwenuyu? Iyu wangukondwa ukongwa ndipu wanguti: ‘Awonani vo Yehova wapanga ndi mbaŵara yangu! Iyu wenge ini.’

Yehova wangukambiya Adamu ndi Eva kuti abali ŵana, azazi charu chapasi. Iyu wakhumbanga kuti agwirengi ntchitu mwakukondwa ndi kupanga charu chosi kuja paradayisu nge mo wenge munda wa ku Edene. Kweni vo Chiuta wakhumbanga ndivu vinguchitika cha. Chifukwa wuli? Tisambirengi vinandi mu mutu unyaki.