Jehovha a di gira lithembwe wulangani wu ranwago pwani Edheni. Lithembwe lolo li di tade khu sifilori, misimbo ni sirengo. Khu gulandreya, Nungungulu a di gira mwama nyo pheye, Adhamu, khu kudzwane a vbedza a furugedza liphuvbo dzithonvuni dzaye. U ngu siti esi si nga girega? Mwama yoyu a di pheya gu vbanya! Jehovha a di ninga lithembwe Adhamu gasi a li thangeya, nigu Nungungulu a di ruma gu riya malina sirengo satshavbo.

Jehovha a di ninga nayo nya lisima ngudzu Adhamu. A di embeya Adhamu, khuye: ‘Hodza mihandro nya misimbo yatshavbo, ganiolu u nga hodzi mihandro nya simbo moyo nyo hathege. Wo hodza handro nya simbo wowo, u nafa.’

Khu guhegisa Jehovha a di khuye: ‘Nyi na gira muphasedzeyi wa Adhamu.’ Jehovha a di gira Adhamu a lala ligovbe nya gutshambe, khavbovbo Nungungulu a di dusa limbambu limwedo la Adhamu, a gira khilo mwangadzi wa Adhamu. Lina laye a diri Evha. Adhamu ni Evha va diri avo ndranga nyo pheye mafuni. Dzi pwide kharini Adhamu tepo a nga ningwa mwangadzi waye? Adhamu a di tsaka  ngudzu, huye khuye: ‘Nga wona egi Jehovha a giridego khu limbambu langu! Kha nya nga ba nyi si virede! Oyu muthu nga eni.’

Jehovha a di embeya Adhamu ni Evha gu khuye va velega sanana va tadza mafu. A di gu vbweta gu khuye va thuma vatshavbo na va tsakide va vbindrugedza mafu ma khala paradhesi, mwendro wulanga nyo mbure, kha nga lithembwe la Edheni. Ganiolu, silo kha sa gimbiya edzi Jehovha a nga ba a si vbwetide khidzo. Khu ginani? Hi na hevbula khiso omu nya gipimo gi landreyago.