Yehovha u endle ntanga endhawini leyi vuriwaka Edeni. Entangeni lowu a ku ri ni swiluva, mirhi ni swiharhi. Endzhaku ka sweswo, Xikwembu xi endle munhu wo sungula Adamu hi ntshuri kutani xi huhutela moya wa vutomi etinhompfini takwe. Xana wa swi tiva leswaku ku endleke yini? Adamu u sungule ku hanya! Yehovha u veke Adamu leswaku a langutela ntanga kutani a n’wi byela leswaku a thya swiharhi mavito.

Yehovha u byele Adamu nawu wa nkoka. U te: ‘U nga dya mihandzu ya murhi wun’wana ni wun’wana wa ntanga handle ka wun’we. Loko wo dya mihandzu ya wona u ta fa.’

Hi ku famba ka nkarhi Yehovha u te: ‘Ndzi ta endlela Adamu mupfuni.’ U etlerise Adamu vurhongo lebyikulu kutani a teka rimbambu ra yena a n’wi endlela nsati. Vito ra nsati loyi a ku ri Evha. Adamu na Evha va ve ndyangu wo sungula. Adamu u titwe njhani  hi nsati wakwe loyi a endleriweke yena? A a tsake ngopfu lerova u te: ‘Yehovha u ndzi endlele wansati wo saseka hi rimbambu ra mina! U fana na mina.’

Yehovha u byele Adamu na Evha leswaku va tswala vana va tata misava. A a lava leswaku va tiphina hi ku tirha swin’we ni ku endla misava hinkwayo yi va paradeyisi ku fana ni ntanga wa Edeni. Kambe a swi vanga tano. Hikwalaho ka yini? Hi ta dyondza swo tala eka ndzima leyi landzelaka.