Yahwe akabyara orugonjo omu kiikaro ekirukwetwa Adeni. Orugonjo runu rukaba rwijwiremu ebyakyo, emiti, hamu n’ebisoro. Hanyuma, Ruhanga akahanga omusaija ow’okubanza ou tumanyire nka Adamu kuruga omu itaka, kandi yamuhuha orwoya omu nyindo. Omanyire ekyabaireho obu yamuhuhire omu nyindo? Akafooka mwomeezi! Yahwe akaha Adamu obujunanizibwa bw’okurolerra orugonjo orwa Adeni, kandi yamuha obujunanizibwa bw’okuruka ebisoro byona amabara.

Yahwe akaha Adamu ekiragiro ekikuru muno. Akamugambira ati: ‘Emiti yoona noikirizibwa kugiryaho oihireho gumu gwonka. Obwolirya ekijuma kyona kuruga ha muti ogu, olifa.’

Hanyuma y’akaire, Yahwe akagamba ati: ‘Ningenda kukorra Adamu omukonyezi.’ Akagwijagiza Adamu, hanyuma yamwihamu orubaju  oruyakozeseze kuhanga omukazi. Ibara lye nuwe Hawa. Nahabweki, eka y’okubanza ekabamu Adamu na Hawa. Adamu akehurra ata obu yarozere omukazi ou bamuhangiire? Akasemererwa muno yagamba ati: ‘Dora Yahwe ekyaihire omu rubaju rwange! Hakire, onu muntu nka nyowe!’

Yahwe akaragira Adamu na Hawa kuzaara abaana baijuze ensi. Akaba n’agonza bakorre hamu, bafoole ensi yoona orugonjo orurungi kandi esemere nka Adeni. Baitu ebintu bitabe nk’oku Yahwe akaba n’agonza. Kiki ekyabaireho? Nitwija kukirora omu suura erukuhonderaho.