I te tahi tuhaa o te fenua, ua faaineine Iehova i te hoê ô, o Edene ïa te iˈoa. Ua î roa teie ô i te mau tiare, te mau tumu raau e te mau animara. I muri iho, ua poiete te Atua i te taata matamua, o Adamu ïa. Ua faaohipa Oia i te repo fenua e ua puhipuhi Oia i te aho i roto i te apoo ihu o Adamu. Ua ite anei oe eaha tei tupu? Ua riro Adamu ei taata ora! Ua parau Iehova ia ˈna ia haapao maitai i te ô e ia horoa i te iˈoa i te mau animara atoa.

Ua horoa Iehova i te tahi faaueraa faufaa roa ia Adamu. Ua na ô râ Iehova: ‘E nehenehe oe e amu i te hotu o te mau tumu raau atoa. Eiaha râ i te hotu o te hoê tumu raau taa ê. Ia amu oe i te reira, e pohe ïa oe.’

I muri aˈe, ua parau Iehova: ‘E hamani au i te hoê tauturu no Adamu.’ Ua faataoto Iehova ia Adamu e i muri iho ua rave oia hoê o to Adamu mau ivi aoao no te poiete i te hoê vahine na Adamu. O Eva to ˈna iˈoa. Ua riro Adamu raua Eva ei utuafare matamua. Eaha to Adamu huru a ite ai i ta ˈna  vahine? Ua oaoa roa Adamu e ua na ô oia: ‘A hiˈo na i ta Iehova i poiete maoti hoê o to ˈu ivi aoao! Oaoa roa vau! Hoê â oia ia ˈu.’

Ua parau Iehova ia Adamu raua Eva ia tamariihia raua e ia faaî i te fenua. Ua hinaaro te Atua ia ohipa amui raua ma te oaoa no te faariro i te fenua atoa ei paradaiso aore ra ei ô nehenehe mau, mai te ô i Edene. Aita râ te reira i tupu. No te aha? E haapii atu â tâua no nia i te reira i to muri mai haapiiraa.