Иегова чараш садты чаяагаш, ону «Эдем» деп адап каан. Аңаа дыка хөй ыяштар, дириг амытаннар, чечектер өзүп турган. Ооң соонда Бурган Адам деп кижини довурактан чаяагаш, думчуунче амыдыралдың тыныжын киир үрүпкен. Оон чүү болган, билир сен бе? Кижи амылыг апарган! Иегова Адамга сад дээш сагыш човаарын база дириг амытан бүрүзүнге ат чогаадырын дааскан.

Адам бир чугула дүрүмнү сагыыр ужурлуг турган. Иегова аңаа: «Бо садта шупту чүвени чип болур сен, чүгле чаңгыс ыяштың чимизин чиве. Бир эвес ону чиптер болзуңза, өлүп каар сен» — дээн.

Оон Иегова: «Адамга дузалакчыны чаяап берейн» — дээн. Бурган Адамны ханы уйгуже киирипкеш, ооң бир ээгизин алгаш, ол ээгиден аңаа кадайны чаяап берген. Ооң адын Ева дээр. Адам биле Ева черге  бир дугаар өг-бүле апарган. Адам кадайынга таарзынган бе? Ийе, ол өөрээнинден: «Экизин! Иегова ээгимден меңээ дөмей кижини чаяап берди!» — деп чугаалаан.

Иегова Адам биле Евага ажы-төлдүг болуп, черни долдурар даалга берген. Ол өг-бүле черни, Эдем ышкаш, чараш дываажаң кылдыр кылыптарын Иегова күзээн. Ынчалза-даа ол чүүл бүтпээн. Чүге? Ону дараазында эгеден билип алыр бис.