Naghimo hi Jehova hin garden ha lugar nga gintatawag nga Eden. Damu gud an bukad, kahoy, ngan mga hayop didto. Tapos, ginhimo niya an siyahan nga tawo, hi Adan, tikang ha tapotapo ngan ginhuypan an irong hito. Maaram ka han sunod nga nahitabo? An tawo nagkaada kinabuhi! Ginsugo ni Jehova hi Adan nga atamanon an garden ngan ngaranan an tanan nga hayop.

Gintagan ni Jehova hi Adan hin importante nga sugo. Hiya nagsiring: ‘Mahimo ka kumaon hin bunga han ngatanan nga kahoy labot la han bunga han usa nga espesyal nga kahoy. Kon kumaon ka hito, mamamatay ka.’

Katapos, hi Jehova nagsiring: ‘Maghihimo ako hin kabulig ni Adan.’ Iya ginpakaturog hin hilarom hi Adan ngan ginkuha an usa nga gusok ni Adan basi himoon nga asawa ni Adan. Eva an iya ngaran. Hira Adan ngan Eva an  nagin siyahan nga pamilya. Ano an inabat ni Adan ha iya asawa? Nalipay gud hiya salit nagsiring hiya: ‘Kitaa an ginhimo ni Jehova tikang ha akon gusok! May kapariho na gihap ako!’

Ginsugo ni Jehova hira Adan ngan Eva nga mag-anak ngan pun-on an tuna. Karuyag niya magin malipayon hira samtang magkaupod nga ginhihimo an bug-os nga tuna nga paraiso, o maopay nga parke, pariho ha garden han Eden. Pero diri ito an nahitabo. Kay ano? Hibabaroan naton ito ha sunod nga leksyon.