Jéeobaeʼ tu beetaj junpʼéel jardín tiʼ junpʼéel lugar ku kʼaabaʼtik Edén. Teʼelaʼ yaan kaʼach yaʼab paakʼaloʼob, cheʼob yéetel baʼalcheʼobiʼ. Dios xaneʼ tu beetaj Adán, le yáax wíinikoʼ. Tu beetaj yéetel luʼum, ka tsʼoʼokeʼ tu yustaj u niʼ. ¿A wojel wa baʼax úuch ka tsʼoʼoki? ¡Le wíinikoʼ kuxlaji! Jéeoba túuneʼ tu yaʼalaj tiʼ Adán ka u kanáant le jardinoʼ yéetel ka u tsʼáa u kʼaabaʼ tuláakal le baʼalcheʼoboʼ.

Jéeobaeʼ yaan baʼax tu yaʼalaj tiʼ Adán maʼ unaj u beetkiʼ. Tu yaʼalajtiʼ: ‹Jeʼel u páajtal a jaantik u yich jeʼel baʼaxak cheʼileʼ, chéen junpʼéel maʼ unaj a jaantik u yichiʼ. Wa ka jaantikeʼ, yaan a kíimil›.

Ka tsʼoʼokeʼ Jéeobaeʼ tu yaʼalaj: ‹Yaan in beetik juntúul máax áantik Adán›. Bey túunoʼ tu beetaj u tʼúubul u weenleʼ ka tu chʼaʼaj junpʼéel u baakel u chʼalaʼatel utiaʼal u beetik u yatan. U kʼaabaʼeʼ Eva. Letiʼobeʼ letiʼe yáax familia anchajoʼ. Tumen jach kiʼimakchaj u yóol Adán ka tu yilaj u  yataneʼ, tu yaʼalaj: ‹¡Jatsʼuts le baʼax tu beetaj Jéeoba yéetel junpʼéel u baakel in chʼalaʼatelaʼ! ¡Beoraaʼ yaan juntúul máax jeʼel bix teneʼ!›.

Jéeobaeʼ tu yaʼalaj tiʼ Adán yéetel Eva ka yanak yaʼab u paalaloʼob utiaʼal u chupikoʼob le Luʼumaʼ. U kʼáat kaʼach ka múul meyajnakoʼob yéetel kiʼimak óolal utiaʼal u sutkoʼob le Luʼum junpʼéel paraísooʼ. Yaan u jatsʼutstal kaʼach tuláakal jeʼex u jardinil Edeneʼ. Chéen baʼaleʼ, maʼ bey úuchikiʼ. ¿Baʼaxten? Yaan k-ilik teʼ tuláakʼ xookoʼ.