Jehová bunybu toib lagary móz ni góc laa Edén. Lainy lagary mózcu goyoʼ xidal clas guieʼ, yac rop né nimal. Después, Dios bisaʼbu primer buñguieeu ni góc laa Adán. Cuaʼbu tidxó yoo né bisaʼbu Adán né después goloʼbu buu xeʼ Adán. ¿Nanlo xí góc ór cú la? ¡Bibanybu xomod lóono! Jehová gonabbu Adán ñan lagary mózcu né láaca nabeʼbu laa guirá nimal.

Jehová gochbu Adán que diti ñonybu toib cós. Goniʼbu: «Labúu guálo xcaa nitisi yac, nosi noʼ toib ni diti non guálo. Pal guálo xcaa yac reʼ saitylo».

Después Jehová goniʼ: «Guisaʼya toib buñ ni gacné Adán». Por ngú bunybu que nanás toib bacaʼalnix Adán né cuaʼbu toib xcoxtil Adán né biquiimbu láani par bisaʼbu toib buñgonaʼ ni góc laa Eva. Adán né Eva góc primer family ni goyoʼ ló Gudxlio.  ¿Xí gosac Adán órni bibiʼbu tzeelbu? Nigolú bibaladxbu por ngú goniʼbu: «¡Ganlo xi bisaʼ Jehová né toib xcoxtila! ¡Ndeʼra ma noʼ toib ni nac xomod naʼ!».

Jehová gochbu Adán né Eva que ñoʼ xidal xiinyibu, né Gudxlio reʼ nadzani né xiinyibu. Jehová goniiny que Adán né Eva goxtiguie ñonyibu dxiin toibsi par ñonyibu Gudxlio reʼ toib lagary móz. Ñacni toib lagary sacróyen xomod lagary ni góc laa Edén. Per diti birebuʼ mod goniiny Dios. ¿Xigony diti birebuʼni? Sanno láani ló stoib lesiony ni sieed.