Nindo moko kinde ma Eva ubino kende, thwol ugam uweco i bang’e. Eyero ire kumae: ‘Nyo andha Mungu kwero nia kud wucam kum nying’ yen ceke m’i podho?’ Eva udwoko kumae: ‘Wacopo camu kum nying’ yen ceke m’i podho, ento Mungu kwero nia kud wacam kum nying’ yen acel kende. Tek wacame, wabitho.’ Thwol uwacu ire kumae: ‘Wubitho ngo. Ento kan wucame, wubidoko calu Mungu.’ Nyo eno bino lemandha? Ungo, eno bino vupo. Re Eva uyio vupone. Eneno nying’ yen maeca tel, man awanyane make. E ecame man edok emio ni cware m’Adamu de camu. Adamu ng’eyo cuu nia gibitho ka giworo ngo dwand Mungu. Re asu ecamu kum nying’ yen ne.

Cing’ nica ku reto, Yehova uweco i bang’ Adamu giku Eva. Epenjogi nia pirang’o giworo ngo dwande. Eva uloko lembe iwi thwol, Adamu ke uloko lembe iwi Eva. Yehova ugam uriemo Adamu giku Eva cen kud i podho pilembe giworo ngo dwande. Eketho malaika man palamularu mi mac i dhu podhone pi nicero Adamu giku Eva kara kud gidok kendo i podhone.

Yehova uyero nia ebimio matira bende ni ng’atu m’uwondo Eva. I andha, thwol uweco ngo en i bang’ Eva. Pilembe Yehova ucwio ngo thwol ku copo mi weco. Utie malaika moko m’ujai re m’utio ku thwol pi niweco i bang’ Eva, kum ebino mito ewonde. Malaikane julwong’e Sitani Wonabali. I nindo m’ubino, Yehova binyotho Sitani kara kud emedere nicwalu dhanu i timo ma reco.