Mä urojja, Evajj sapakïskänwa, ukhaw mä asirojj jupar parljjayäna. Ukatsti akham sasaw jisktʼäna: ‘¿Cheqapunit Diosajj taqpach frutanakat jarkʼasipjjtamjja?’ sasa. Evasti sänwa: ‘Kawkïr frutsa manqʼasipkiristwa, mä alin frutapakwa jan manqʼapkiristti. Manqʼapjjerista ukhajj jiwapjjeristwa’ sasa. Asirusti sarakïnwa: ‘Janiw jiwapkätati. Antisas manqʼapjjäta ukhajj Diosjamäpjjätawa’ sasa. ¿Ukajj cheqänti? Janiwa. Ukampis Evajj creyïnwa. Uka fruta wal uñchʼukisajj wal manqʼantañ munäna, ukatwa manqʼantäna, Adanarus churarakïnwa. Uka fruta manqʼantasajj jiwapjjañapänwa, uk yatkasaw Adanajj manqʼantäna.

Uka uru jaypʼpachaw Jehová Diosajj Adanampi Evampi parläna. ‘¿Kunatsa ewjjaj jan istʼapkta?’ sasaw jisktʼäna. Evajj ‘asiruw juchani’ sänwa, Adanasti ‘Evaw juchani’ sarakïnwa. Niyakejjay Adanampi Evampi juchachasipjjchïnjja, Jehová Diosajj uka suma jardinat anqaruw apsjjäna. Ukatsti jardinar mantañäki ukawjarojj angelanakampi nakhaskir mä espadampi Diosajj uchäna, ukhamat janipun mantapjjañapataki.

‘Evar kʼarinak parlirirojj castigäwa’ sasaw Diosajj sarakïna. ¿Khitis Evar parläna? Diosajj janiw asirurojj parlir lurkänti. Ukhamajj janiw asirojj Evar parlkänti, jan ukasti mä jan wali angelaw asir taypi parläna. Uka angelajj Satanás, Diablo satawa. Jehová Diosaw jutïrin jupar jiwayjjani. Janiw jan walinak lurapjjañapatakejj jaqenakar engañjjaniti.